Nicholis Louw tydens die programbekendstelling
Die amptelike programbekendstelling van alles wat op vanjaar se Innibos Kunstefeesprogram verwag kan word het op 10 Mei 2012 in Nelspruit plaasgevind. Die bekendstelling is vanjaar vir die eerste keer as ’n publieke bekendstellingskonsert aangebied, en letterlik duisende mense het by Bergvlam byeengekom om die geleentheid by te woon.
Die Innibos feesprogram, wat vanaf 27 tot 30 Junie strek, bied vanjaar weer ’n fees van toneel, musiek, boeke en kuns aan. Op die toneelfront kan feesgangers uitsien na Die Van Aardes van Grootoor, uit die pen van Pieter-Dirk Uys. Hierdie klassieke verhoogstuk, met Anna-Mart
van der Merwe en Marion Holm onder andere in die rolverdeling, beloof om gehore van voor af te verower. Toe dit 23 jaar gelede vir die eerste maal opgevoer is,het dit ’n twee jaar ononderbroke speelvak geniet. Toneelproduksies soos Grieta kry geleerdheid, met Chris van Niekerk en Lulu Botha in die hoofrolle en die bekroonde toneelstuk, Mooi Maria is verdere hoogtepunte op die toneelprogram. Voor ek vergeet, met
Amanda Strydom, wat vir die eerste keer in 23 jaar haar talent as aktrise weer op die verhoog ten toon stel, het vol sale by die ABSA KKNK getrek en beloof om dieselfde by Innibos te doen. Marthinus Basson se geniale aanbieding van die teaterstuk Die vrou vantevore met Brümilda van Rensburg, Stian Bam en Erica Wessels in die hoofrolle gaan eweneens gehore op die voorste punt van hul stoele vasgenael hou.
Komedie is altyd ’n belangrike deel van die Innibos-program en stukke soos My vrou se man se vrou, met die immergewilde Tobie Cronjé, Neels van Jaarsveld in Pa…vir Dummies, Buurtwag, Dowwe Dolla Dink Diep en Neels Clasen in die skreeusnaakse Annale van ‘n Windgat gaan sorg vir genoeg ligte oomblikke. Kopstukke, die bekroonde donker komedie van Jeanne Goosen met Lizz Meiring en André Stolz (wat ook in die oorspronklike speelvak 20 jaar gelede die rolle vertolk het) in die rolverdeling bring lag met ’n traan.
Op die musiekfront bied Innibos vanjaar ’n debuutproduksie aan waarin Chris Chameleon en die Drakensberg Seunskoor saam optree in die Sudwala Grotte. Hierdie produksie word spesiaal vir Innibos geskep. Chris se droom was om deel van die Drakensberg Seunskoor te wees. Dit was hom nie beskore nie, en om saam aan hierdie produksie te kon werk was in baie opsigte vir hom én die Seunskoor ’n droom wat waar geword het. Die produksie heet, heel gepas, Dreams.
Op die klassieke front word ‘n interessante produksie aangebied met ’n verskeidenheid klassieke musici wat kort musikale programme in vertrekke van ’n pragtige Toskaanse gastehuis gaan lewer. Jannie Moolman, die Drakensberg Kamerkoor, Zanta Hofmeyer en Susan Mouton is onder andere deel van hierdie program. Coeniede Villiers, Laurika Rauch en Romanz en Nianell sorg vir uitstekende balans en verskeidenheid in die musiekprogram.
Die Rapport Boeke-crawl en die Sappi Boeke Oppistoep-program beloof heerlike pitkos vir boekeliefhebbers. Die crawl neem besoekers op ’n interessante woord- en klankreis in die romantiese dorpie Kaapsehoop. Met skrywers, woordkunstenaars en musici soos Johan Bakkes, Jannie du Toit en Paul Eilers op die program is dit ‘n geleentheid wat feesgangers nie durf misloop nie! By die Boeke Oppistoep-program gaan Jannie du Toit, Johan Bakkes en Riaan Cruywagen oor hul boeke en skryfwerk gesels. Lochner de Kock en Jannie du Toit gaan ook hul Cordon Broers Kôssert aanbied waarin boeke, kos en musiek gekombineer word.
Die leefstylproduksie, Boeke Bacchus en Brood, met Lizz Meiring, Jak de Priester en Ilse Salzwedel is ’n unieke wyn– en nartjieproe, gekombineer met musiek en woordkuns.
Vanjaar se feeskunstenaarsuitstalling bied, in teenstelling met die ernstige aard van verlede jaar se uitstalling deur die veelbekroonde Diane Victor, letterlik ’n visuele blaaskans. Die uitstalling deur Diek Grobler en Craig Muller is in alle opsigte ’n speelse verkenning van die moontlikhede wat daar in die visuele realm skuil. Beide hierdie kunstenaars het al nasionaal en internasionaal uitgestal en geniet wyd erkenning in hul onderskeie genres. Diek is ook die skepper van vanjaar se amptelike feeskat vir die feesreklame.
Soos gewoonlik is die feesterreinprogram by Bergvlam Hoërskool ‘n luisterfees met al die land se gewildste kunstenaars wat optree. Steve Hofmeyr, Elvis Blue, Theuns Jordaan en Jakkie Louw is maar ’n paar van die kunstenaars wat in die feesterreinkonserte op die Standard Bank-verhoog gaan optree. Op Saterdagaand, by die JacarandaFM-konsert, gaan The Parlotones die verhoog deel met gewilde sangers Juanita du Plessis, Riana Nel, Kurt Darren, Nicholis Louw en Robbie Wessels. Die fees word oudergewoonte op Sondag 1 Julie afgesluit met die gratis
ATKV Loof Hom Innibos-konsert waarin kunstenaars soos Joe Niemand, Liesl Marx en Manie Jackson optree.
Daar is vier gratis musiekverhoë op die feesterrein wat musiek vir alle smake aanbied. Die MK rock-verhoog, met aKING, Van Coke Kartel, Die Heuwels Fantasties en Fokofpolisiekar op die program beloof om die jongklomp gelukkig te hou. Die KMIA Kunspark-verhoog bied ligte luistermusiek, en die Huletts en Klipdrift-verhoë bied ’n wye verskeidenheid populêre musiek van vroeg tot laat. Kunstenaars soos Adam, Willem Botha, Charlize Berg en die Radio Kalahari Orkes tree hier op.
‘n Nuwigheid op die feesterrein is die Boma Kuierteater. Hierdie gratis toneelvenue op die feesterrein spog met akteurs soos Lizz Meiring, Paul Eilers, Melt Sieberagen, Karen Wessels en die mimiekkunstenaar John Jacobs op die program. ’n Aantal opkomende akteurs is ook hier te sien. “Met hierdie nuwe venue poog ons om die aanbieding op die feesterrein te verbreed om nie net musiek in te sluit nie. Dit bied die gemiddelde feesganger gratis toegang tot puik kort toneelproduksies en stel teater dan ook hierdeur aan nuwe gehore bekend,” sê Sandra Jacobs, die fees se bemarkingsbestuurder.
Kaartjies vir die Innibos feesterrein en vir al die feesproduksies is vanaf Maandag 14 Mei landwyd beskikbaar by Computicket. In Nelspruit kan kaartjies ook by die feeskantoor en verskeie sentrale punte gekoop word.
